# 泛粵典網頁版

當前版本：0.8.34.2

泛粵典網頁版網址：jyutdict.org (opens new window)

注意：若果你有安卓設備，我哋強烈推薦你用「泛粵典安卓版」而唔係本「網頁版」，因爲「安卓版」數據、功能都更加完整。

以下係「泛粵典網頁版」嘅介紹。

# 1. 綜述

目前（2019 年），泛粵典旨在收集現時各地讀音、歷史韻書地位及擬音，同時提供咗啲基本查詢功能，包括查字、查音。未來再繼續加入查韻（按音韻地位檢索）及查詞等功能同埋更多字表。

網絡諸多面向公眾嘅粵語查詢網站大多數都係「查廣州音嘅網站」，然而粵語唔凈只有廣州話，我哋希望可以對各方言一視同仁，而家就係順住信息化嘅東風，將呢啲資料匯總，嘗試做成面向兼顧（有一定基礎嘅）大眾以及有參考需求嘅音韻愛好者嘅風格。

相比小學堂，此處各地字表、韻書數據都係由嶺南粵音群內各地學者提供（詳見本文底部名單），由此地方音基本上都係佢哋經過自我審查、去除猩化讀音後嘅當地音。可能有少數字會被手動高舉化，但總體上都仲係可以反映當地原本嘅讀音情況。

爲咗方便對比，字頭下低跗注咗《廣韻》地位信息 (opens new window)以及 Polyhedron 嘅中古拼音 (opens new window)，其表示方法同「漢字古今中外讀音查詢」App (opens new window)。

地方音表格第三、四列分別係擴展粵拼（J++）以及 IPA 記音，第五列係備註，通常係對多音字嘅例詞或說明。

查音只支持擴展粵拼（J++），支持模糊檢索，使用“%”可代表聲母、韻腹或韻尾，調號可以省略代表「聲調不敏感」。

# 2. 泛粵字表

泛粵字表收錄泛粵粵語中相較普通話更有「粵語特色」嘅字，並使用擴展粵拼（J++）記錄該字喺各點中嘅讀音。截至 2019 年 7 月末合計收錄 2500+ 條。

雖然字表釋義可能兼顧唔到多地用法，各地嘅記錄亦都可能受限於編者知識而未夠精準，但起碼可以將呢啲特色字不分地位噉數位化記錄保存，同時可大致確定某字某義嘅使用範圍。反之，各地字音亦都可以提供畀字頭更精細嘅音韻地位信息。

其中，第 A 列係「錔字」。「錔字」唔代表本字或正字，而只係基於音、義來揀出嘅相對合理嘅字，因此既不過分追求本字，不抵制使用口字旁俗字，亦不強求作爲日常打字使用。

第 C 列係「泛粵綜合音」，即係融合各方言點最高舉處而成嘅人工音系。目前使開以下啲奇離法則：

聲母：

z c s / zh ch sh：分韻精照（精 i 相容師韻 ii，故唔再標）

j / nj：分韻日母

韻母：

aa / ae / e / i：ae 儘量表示二等，視乎順德等埞有冇高化；e 陰聲韻儘量表示蟹同埋支白，i / e 陽（入）聲韻見後

o / oe：oe 除咗音系表示果三合之外，亦表示果開白讀，視乎具體文白

ui / ooi / yi / yu：分韻魁（ui）雖（ooi）諸（yu）韻，切要裂化精組遇（yi）視乎各埞有冇裂化

im in ing / em en eng：三四等文白，儘量照顧白讀，亦考慮各方音文白比例（入聲韻同理）

ing / yng：梗曾三四等，視乎鬱林等埞有冇圓脣（入聲韻同理）

ong / owng：宕江，視乎鬱林等埞有冇圓脣（入聲韻同理）

聲調：

入聲 4 / 6：上下陽入，視乎元音長短，主要參照鬱林